+355 4 22 47 447
info.aqtn@aqtn.gov.al
“Pa arkiva s'ka histori, pa histori s'ka komb.”
Krijimi i AQTN-së
Arkivi Qëndror Teknik i Ndërtimit (AQTN) është krijuar si kërkesë e kohës më 26.07.1993, mbi bazën e bërthamës së arkivave në varësi të ish-Ministrisë së Ndërtimit, aktualisht Ministria e Infrastrukturës dhe Energjisë, me qëllim grumbullimin, ruajtjen, administrimin dhe përpunimin e dokumenteve teknike të institucioneve projektuese publike, nga viti 1911 e në vazhdim.
Historiku
AQTN është institucion shtetëror që mbledh, përpunon, administron, ruan dhe shërben pasurinë arkivore, e cila mbrohet dhe sigurohet nga shteti. Kjo pasuri është dokumentacion teknik me vlera shkencore, teorike e praktike në fushën e ndërtimit, me interes historik kombëtar, dhe është pjesë e Fondit Arkivor Kombëtar Shqiptar (FAKSH).
AQTN-ja është institucion me rëndësi kombëtare, me vlera të veçanta kulturore e shkencore, sepse në të janë të arkivuara të gjitha dokumentacionet që kanë të bëjnë me ndërtimet e bëra në të gjithë territorin e vendit tonë, për një periudhë që përfshin fillimet e shekullit XX e në vazhdim. Zhvillimi intensiv i infrastrukturës së Shqipërisë shton një detyrë të menjëhershme dhe konkrete në menaxhimin e saktë dhe të shpejtë të dokumentacionit teknik ekzistues të objekteve dhe veprave të infrastrukturës, arkitekturës, urbanistikës, gjeologjisë dhe gjeodezisë.
Në kushtet e sotme, ku kërkesat për qarkullimin e informacionit dhe përpunimin e tij janë mjaft të larta, institucioni ynë ka hedhur hapat e parë të digjitalizimit të këtyre projekteve, duke dhënë sot një produkt digjital të dokumentit arkivor dhe duke krijuar mundësinë e ruajtjes së kësaj pasurie kombëtare dhe lehtësinë e informimit nga AQTN për çdo studiues shqiptar ose të huaj. Pasurimi, evidentimi, klasifikimi, përpunimi tekniko-shkencor, ekspertiza, ruajtja dhe shfrytëzimi i dokumenteve të AQTN-së bëhen në bazë të Normave Tekniko-Profesionale dhe Metodologjike të shërbimit arkivor në Republikën e Shqipërisë, të miratuara nga Drejtoria e Përgjithshme e Arkivave (DPA) dhe të sanksionuara në nenin 15 të Ligjit nr. 9154, datë 06.11.2003.
AQTN po punon vazhdimisht për skanimin e materialit teknik arkivor, ku deri tani është realizuar skanimi 100% i dokumentacionit teknik të viteve 1911–1990. Vazhdon puna për skanimin e dokumenteve teknike për periudhën pas vitit 1990 e në vazhdim. Dokumentacioni teknik i periudhës 1911–1990 përpunohet, indeksohet dhe atashohet në programin aplikativ të AQTN-së.
Në bazë të nenit 8 të Ligjit për FAKSH, arkivi ka detyrim ligjor t’i vërë në dispozicion dokumentet që ruhen në AQTN dhe t’u shërbejë me to institucioneve dhe individëve. Punonjësit e rrjetit arkivor kombëtar, në zbatim të nenit 58 të Ligjit “Për arkivat”, shërbejnë dokumentet besnikërisht sipas origjinalit, pa komente ose interpretime.
Godina
Godina e AQTN-së është ndërtuar rreth vitit 1970. Në vitin 1995 iu bë një rikonstruksion i pjesshëm, i realizuar nga Ministria e Ndërtimit. Më pas, nga një vlerësim fizik i bërë po nga specialistë të Ministrisë së Ndërtimit, u vërejtën probleme serioze konstruktive, si cedimi i themeleve dhe, si pasojë, çarje në mure dhe në nënshtresat e shtresat e dyshemesë, probleme lagështie nga ujërat nëntokësore, humbje termike të godinës, si dhe probleme të tjera. Për këtë arsye u pa i domosdoshëm rikonstruksioni i godinës, rezultati i të cilit pasqyrohet në fotot e mëposhtme.
